ट्रम्पले गरे इरानको प्रस्ताव अस्वीकार, युद्ध अन्त्य तत्काल सम्भव नरहेको संकेत

काठमाडौं । अमेरिकी राष्ट्रपति डोनाल्ड ट्रम्पले इरानले अघि सारेको पछिल्लो शान्ति प्रस्तावप्रति गहिरो असन्तुष्टि व्यक्त गर्दै तत्काल युद्ध अन्त्य हुने सम्भावनालाई नकारेका छन् । तेहरानको प्रस्तावमा रहेका सर्तहरू आफूलाई स्वीकार्य नभएको स्पष्ट पार्दै उनले भने, “तिनीहरू म सहमत हुन नसक्ने कुराहरू मागिरहेका छन्।”

राष्ट्रपति ट्रम्पले द्वन्द्वको कुनै पनि प्रारम्भिक अन्त्यले भविष्यमा थप जटिलता निम्त्याउन सक्ने चेतावनी दिए। विशेषगरी होर्मुज जलडमरूमध्य पार गर्ने जहाजहरूबाट इरानले शुल्क उठाउने विषयमा वासिङ्टनले कडा प्रतिबन्ध लगाउन सक्ने जोखिम रहेको संकेत गरिएको छ।

हालको परिस्थितिमा इरानको आणविक कार्यक्रम वार्ताको सबैभन्दा संवेदनशील र निर्णायक मुद्दा बनेको छ। ट्रम्प आफ्ना केही ‘रेड लाइन’मा पूर्णरूपमा अडिग देखिएका छन्, यद्यपि ती सार्वजनिक रूपमा स्पष्ट पारिएका छैनन्। तर अमेरिकाको प्रमुख अडान भनेको इरानले कुनै पनि हालतमा आणविक हतियार प्राप्त नगर्ने प्रतिबद्धता जनाउनुपर्ने हो, जुन स्थायी हुनुपर्नेमा ट्रम्पको जोड छ।

इरानको सैन्य क्षमताबारे टिप्पणी गर्दै ट्रम्पले अमेरिकी सेनाले इरानी संरचनालाई कमजोर बनाएको दाबी दोहोर्‍याए। वार्ताको वर्तमान अवस्थाप्रति असन्तोष जनाउँदै उनले “म खुसी छैन” भन्दै प्रतिक्रिया दिए।

कतिपयले अमेरिका इरानसँगको युद्धमा सफल नभइरहेको भन्ने टिप्पणीलाई ट्रम्पले कडा शब्दमा अस्वीकार गर्दै त्यस्तो अभिव्यक्तिलाई देशद्रोहको संज्ञा दिए। फ्लोरिडा प्रस्थान गर्नुअघि सञ्चारकर्मीहरूसँग कुरा गर्दै उनले इरानसँग कुनै सम्झौता नगर्नु नै देशका लागि उपयुक्त हुन सक्ने संकेत गरे। “सत्य भन्नुपर्दा, सायद हामी सम्झौता नगर्नु नै राम्रो हुन्छ,” उनले भने।

ट्रम्पले यदि अन्तर्राष्ट्रिय समुदाय सहमत भए आफूले इरानी सेनालाई कमजोर बनाएको र अर्थतन्त्रमा गम्भीर असर पारेको दाबी पनि गरे। साथै, उनले इरानी सरकारले ४२ हजार निर्दोष प्रदर्शनकारीको हत्या गरेको आरोपसमेत लगाए, यद्यपि यस दाबीबारे स्वतन्त्र पुष्टि भएको छैन।

यसैबीच, अमेरिकी केन्द्रीय कमाण्ड (सेन्टकम)का कमाण्डर एडमिरल ब्राड कूपरले ह्वाइट हाउस सिचुएसन रुममा राष्ट्रपति ट्रम्पलाई इरानविरुद्ध सम्भावित सैन्य विकल्पबारे जानकारी गराएका छन्। ती विकल्पहरूमा पहिलो पटक हाइपरसोनिक मिसाइल प्रयोग गर्ने सम्भावनासमेत समावेश रहेको जनाइएको छ। स्रोतका अनुसार, यदि पुनः आक्रमण गर्ने निर्णय भएमा यो ‘सानो तर अत्यन्त शक्तिशाली आक्रमण’ हुन सक्ने बताइएको छ।