आजको मौसम : यी क्षेत्रमा वर्षाको सम्भावना, सतर्कता अपनाउन आग्रह

काठमाडौं । देशका विभिन्न क्षेत्रमा आज वर्षा हुने सम्भावना रहेको छ। उपल्लो वायुमण्डलमा रहेको पश्चिमी न्यून चापीय प्रणाली र स्थानीय वायुको प्रभावका कारण मौसममा बदली बढेको मौसमविद्ले बताएका छन्।

हाल गण्डकी, लुम्बिनी र कर्णाली प्रदेशसहित अधिकांश पहाडी तथा हिमाली क्षेत्रमा बदली रहेको छ भने तराईका धेरै स्थानमा आंशिक बदली देखिएको छ। केही स्थानमा हल्का वर्षा पनि भइरहेको छ।

मौसम पूर्वानुमानअनुसार दिउँसो कोशी, मधेश र बागमती प्रदेशका साथै पहाडी तथा हिमाली भूभागका विभिन्न स्थानमा मेघगर्जन र चट्याङसहित वर्षा हुन सक्ने सम्भावना छ। तराईका केही क्षेत्रमा पनि वर्षा हुन सक्ने जनाइएको छ।

रातिको समयमा पनि कोशी प्रदेश तथा बागमती र गण्डकी प्रदेशका पहाडी तथा हिमाली क्षेत्रमा बदली कायम रहने र केही स्थानमा मध्यम वर्षा हुन सक्ने अनुमान गरिएको छ। उच्च हिमाली क्षेत्रमा हल्का हिमपातको सम्भावना समेत रहेको मौसमविद्ले बताएका छन्।

वर्षा, चट्याङ तथा सम्भावित हिमपातका कारण दैनिक जनजीवन, कृषि कार्य, सडक तथा हवाई यातायात प्रभावित हुन सक्ने भएकाले आवश्यक सावधानी अपनाउन सम्बन्धित निकाय र सर्वसाधारणलाई आग्रह गरिएको छ।