इरानमाथि आक्रमणको चेतावनीपछि ट्रम्पको यू–टर्न, सैन्य कारबाही स्थगित भएको दाबी

काठमाडौं । इरानविरुद्ध कडा सैन्य कारबाहीको चेतावनी दिएका अमेरिकी राष्ट्रपति डोनाल्ड ट्रम्प केही घण्टामै आफ्नो अडानबाट पछि हटेका छन्। उनले इरानसँगको कूटनीतिक संवाद सकारात्मक चरणमा पुगेकाले प्रस्तावित आक्रमण रोकिएको बताएका छन्।

ट्रम्पले आफ्नो सामाजिक सञ्जालमार्फत इरानसँगको वार्ता उच्च तहसम्म पुगेको र त्यसले सार्थक दिशा लिएको दाबी गरेका हुन्। वार्तामा संलग्न पक्षहरूबीच महत्वपूर्ण विषयमा सहमति जुट्ने संकेत देखिएपछि सैन्य विकल्पलाई तत्कालका लागि स्थगित गरिएको उनको भनाइ छ।

उनले पूर्वनिर्धारित रूपमा तयारी गरिएको आक्रमण तथा बमबारीको योजना रद्द गरिएको उल्लेख गर्दै वार्ताबाट समाधान खोज्ने प्रयासलाई प्राथमिकता दिइएको जनाएका छन्।

ट्रम्पको पछिल्लो अभिव्यक्तिलाई मध्यपूर्वमा बढ्दो तनाव कम गर्ने संकेतका रूपमा हेरिएको छ। यद्यपि इरान र अमेरिकाबीचका मतभेद पूर्ण रूपमा अन्त्य भइनसकेको विश्लेषकहरूको भनाइ छ।

हाल दुवै पक्षबीच कूटनीतिक संवाद जारी रहेकाले आगामी दिनमा हुने वार्ताको नतिजाले क्षेत्रीय राजनीतिक अवस्थालाई थप प्रभावित पार्ने अपेक्षा गरिएको छ।