सन् २०५० सम्म विश्वभर क्यान्सरका नयाँ बिरामी ६७ प्रतिशतले बढ्न सक्ने चेतावनी

काठमाडौं। सन् २०५० सम्म विश्वभर क्यान्सरका नयाँ बिरामीको संख्या हालको तुलनामा ६७ प्रतिशतले बढ्न सक्ने चेतावनीसहित नयाँ अन्तर्राष्ट्रिय प्रतिवेदन सार्वजनिक भएको छ।

अमेरिकन क्यान्सर सोसाइटी र विश्व स्वास्थ्य संगठन (डब्लुएचओ) अन्तर्गतको इन्टरनेशनल एजेन्सी फर रिसर्च अन क्यान्सर (आईएआरसी) ले संयुक्त रूपमा सार्वजनिक गरेको प्रतिवेदनअनुसार जनसंख्या वृद्धि र औसत आयु बढ्दै जाँदा क्यान्सरको भार उल्लेख्य रूपमा बढ्ने अनुमान गरिएको हो।

प्रतिवेदनका अनुसार सन् २०२४ मा विश्वभर करिब २ करोड १० लाख नयाँ क्यान्सरका बिरामी फेला परेका थिए भने ९८ लाख जनाको क्यान्सरका कारण मृत्यु भएको थियो।

अनुसन्धानकर्ताहरूले सन् २०५० सम्म वार्षिक नयाँ क्यान्सरका बिरामीको संख्या ३ करोड ४० लाख पुग्ने प्रक्षेपण गरेका छन्, जुन हालको तुलनामा ६७ प्रतिशत बढी हो।

प्रतिवेदनमा फोक्सोको क्यान्सर विश्वभर सबैभन्दा धेरै देखिने तथा सबैभन्दा बढी मृत्यु गराउने क्यान्सरका रूपमा रहेको उल्लेख गरिएको छ। यसको प्रमुख कारण सुर्तीजन्य पदार्थको सेवन रहेको अनुसन्धानकर्ताहरूले बताएका छन्।

विशेषज्ञहरूले सुर्तीजन्य पदार्थको प्रयोग त्याग्ने, मदिरा सेवन सीमित गर्ने, स्वस्थ तौल कायम राख्ने, नियमित शारीरिक व्यायाम गर्ने, क्यान्सरसँग सम्बन्धित संक्रमणबाट बच्ने, समयमै परीक्षण गराउने तथा उपचार सेवामा पहुँच विस्तार गर्न सके लाखौँ जीवन बचाउन सकिने बताएका छन्।

उनीहरूका अनुसार रोकथाम, प्रारम्भिक पहिचान र प्रभावकारी उपचारमा लगानी बढाउन सके आगामी दशकहरूमा क्यान्सरको बढ्दो भारलाई कम गर्न महत्वपूर्ण योगदान पुग्नेछ।