केही स्थानमा वर्षा र हिमपातको सम्भावना, तीन प्रदेशमा भारी वर्षा हुनसक्ने

काठमाडौं । देशका केही स्थानमा आज वर्षा हुने सम्भावना रहेको छ। जल तथा मौसम विज्ञान विभागका अनुसार देशका विभिन्न भूभागमा मध्यमदेखि भारी वर्षा तथा हिमाली क्षेत्रमा हिमपातको सम्भावना रहेको छ।

विभागका अनुसार आज दिउँसो देशभर साधारणतया बदली रहनेछ। कोसी, वाग्मती र गण्डकी प्रदेशका हिमाली भूभागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली क्षेत्रका थोरै स्थानमा मध्यमसम्म वर्षा तथा हिमपात हुने सम्भावना रहेको छ।

यस्तै, देशका पहाडी भूभागका केही स्थानमा मध्यमसम्म वर्षा तथा हिमपातको सम्भावना रहेको विभागले जनाएको छ। तराई भूभागका थोरै स्थानमा पनि मध्यमसम्म वर्षा हुन सक्ने पूर्वानुमान गरिएको छ।

विभागका अनुसार कोसी, वाग्मती र गण्डकी प्रदेशका पहाडी भूभागका एक–दुई स्थानमा भारी वर्षा हुन सक्ने सम्भावना रहेको छ।

भारी वर्षाको सम्भावना रहेका स्थानमा वर्षाका कारण सडक तथा यातायातमा असर पर्न सक्ने भएकाले आवश्यक सतर्कता अपनाउनुपर्ने देखिन्छ।

आज राति देशका हिमाली तथा पहाडी भूभागमा साधारणतया बदली रहनेछ भने तराई भूभागमा आंशिक बदली रहने विभागले जनाएको छ।

राति कोसी, वाग्मती, गण्डकी र कर्णाली प्रदेशका हिमाली भूभागका थोरै स्थानमा मध्यमसम्म वर्षा तथा हिमपात हुने सम्भावना रहेको छ।

त्यस्तै, लुम्बिनी र सुदूरपश्चिम प्रदेशका हिमाली भूभागका एक–दुई स्थानमा मध्यमसम्म वर्षा तथा हिमपात हुन सक्ने विभागको पूर्वानुमान छ।

राति कोसी, वाग्मती, गण्डकी र लुम्बिनी प्रदेशका पहाडी भूभागका थोरै स्थानमा मध्यमसम्म वर्षा हुने सम्भावना रहेको छ। कर्णाली र सुदूरपश्चिम प्रदेशका पहाडी क्षेत्रमा पनि एक–दुई स्थानमा मध्यमसम्म वर्षा हुन सक्ने विभागले जनाएको छ।

तराई भूभागका एक–दुई स्थानमा समेत मध्यमसम्म वर्षा हुने सम्भावना रहेको छ।

हाल देशभर मनसुनी वायुका साथै पश्चिमी वायुको समेत आंशिक प्रभाव रहेको विभागले जनाएको छ।

विभागका अनुसार मनसुनको न्यूनचापीय रेखा भने सरदर स्थानको दक्षिणतर्फ रहेको छ। यही मौसमी प्रणालीको प्रभावका कारण देशका विभिन्न भूभागमा बदली, वर्षा तथा हिमाली क्षेत्रमा हिमपातको सम्भावना देखिएको हो।

वर्षा तथा हिमपातको सम्भावना रहेका क्षेत्रमा मौसमको अवस्था हेरेर यात्रा गर्न र सम्भावित जोखिमबाट बच्न आवश्यक सतर्कता अपनाउन विभागले आग्रह गरेको छ।