अतिरिक्त समयमा अर्जेन्टिनाको संघर्षपूर्ण जित, केप भर्डलाई हराउँदै अन्तिम १६ मा प्रवेश
एक महिना अगाडि
काठमाडौं। साविक विजेता अर्जेन्टिनाले पहिलोपटक विश्वकप खेलिरहेको केप भर्डलाई अतिरिक्त समयमा ३-२ ले पराजित गर्दै फिफा विश्वकपको अन्तिम १६ मा स्थान सुरक्षित गरेको छ।
शुक्रबार मियामी स्टेडियममा भएको रोमाञ्चक प्रतिस्पर्धामा अर्जेन्टिनाले दुई पटक अग्रता लिए पनि केप भर्डले दुवै पटक शानदार पुनरागमन गर्दै खेललाई अतिरिक्त समयसम्म पुर्याएको थियो। तर अतिरिक्त समयको दोस्रो हाफमा भएको आत्मघाती गोल निर्णायक बन्दा अर्जेन्टिना विजयी बन्न सफल भयो।
अर्जेन्टिनाका लागि खेलको २९औँ मिनेटमा कप्तान लियोनल मेसीले गोल गर्दै टोलीलाई अग्रता दिलाएका थिए। दोस्रो हाफमा केप भर्डका डेरोय डुआर्टेले बराबरी गोल फर्काएपछि निर्धारित समय १-१ को बराबरीमा सकिएको थियो।
अतिरिक्त समयको सुरुआतमै लिसान्ड्रो मार्टिनेजले गोल गर्दै अर्जेन्टिनालाई पुनः अग्रता दिलाए पनि सिड्नी लोपेस काब्रालले सुन्दर प्रहारमार्फत फेरि खेल २–२ को बराबरीमा ल्याएका थिए।
खेल पेनाल्टीतर्फ जाने संकेत देखिएको अवस्थामा अतिरिक्त समयको दोस्रो हाफमा मेसीको कर्नरमा आएको बल केप भर्डका डिफेन्डर डिने बोर्जेसबाट आत्मघाती गोल हुन पुग्यो। सोही गोल अर्जेन्टिनाको जितको आधार बन्यो।
जितसँगै अर्जेन्टिनाले अन्तिम १६ मा स्थान सुरक्षित गरेको छ, जहाँ उसले मंगलबार इजिप्टसँग प्रतिस्पर्धा गर्नेछ। पहिलोपटक विश्वकप खेलेको केप भर्ड भने प्रतियोगिताबाट बाहिरिए पनि उत्कृष्ट प्रदर्शन गर्दै सबैको प्रशंसा बटुल्न सफल भएको छ।
