नेप्सेमा सुधार, उतारचढावबीच १४ अंकको वृद्धि

अघिल्लो कारोबार दिन १३.९५ अंकले घटेको नेपाल स्टक एक्सचेन्ज (नेप्से) परिसूचक बिहीबार भने सुधारिएको छ। कारोबार अवधिभर उतारचढाव देखिए पनि अन्त्यमा नेप्से १४.१७ अंकले बढेर २७२६ अंकमा पुगेको हो। यही स्तर दिनभरकै उच्च विन्दु पनि रह्यो।

बजार खुलेको केही समयपछि लगानीकर्ताको बिक्री दबाब बढ्दा नेप्से दिउँसो १२:२३ बजे २६८९ अंकसम्म झरेको थियो। त्यसपछि क्रमशः खरिदकर्ता सक्रिय बन्दै जाँदा बजारले पुनः लय समात्यो र अन्त्यमा हरियाली कायम गर्न सफल भयो।

आज १४९ कम्पनीको सेयर मूल्य बढ्दा ११५ कम्पनीको मूल्य घटेको छ भने १२ कम्पनीको मूल्य स्थिर रहेको छ। यद्यपि कारोबार रकम भने अघिल्लो दिनको तुलनामा घटेको छ। बुधबार ५ अर्ब १८ करोड रुपैयाँ बराबरको कारोबार भएकोमा बिहीबार ४ अर्ब ६७ करोड रुपैयाँमा सीमित रह्यो।

समूहगत सूचकतर्फ अधिकांश क्षेत्र सकारात्मक रहे। व्यापार समूह सबैभन्दा धेरै २.५८ प्रतिशतले बढ्यो। बैंकिङ, विकास बैंक, फाइनान्स, होटल तथा पर्यटन, जलविद्युत्, जीवन बीमा, उत्पादन तथा प्रशोधन, माइक्रोफाइनान्स तथा निर्जीवन बीमा समूहमा पनि वृद्धि देखियो। अन्य र लगानी समूह भने सामान्य रूपमा घटेका छन्।

व्यक्तिगत कम्पनीतर्फ हालै सूचीकृत एभरेस्ट कलरको सेयर मूल्य १५ प्रतिशतले बढ्दै सबैभन्दा धेरै कमाउने कम्पनी बन्यो। स्नो रिभर्स, एपोलो हाइड्रोपावर, होटल फरेस्ट इन र सोपान फर्मास्युटिकल्सको मूल्य पनि उल्लेख्य रूपमा बढ्यो।

उता, कुथेली बुखरी स्मल हाइड्रोपावरको सेयर मूल्य १५ प्रतिशतले घट्यो। संस्थापक, स्थानीय तथा कर्मचारी समूहको लक–इन अवधि सकिएपछि ठूलो मात्रामा सेयर बजारमा आउँदा मूल्यमा दबाब परेको विश्लेषण गरिएको छ। बुंगल हाइड्रोपावर र रिलायन्स स्पिनिङ मिल्सको मूल्य पनि घटेको छ।

कारोबार रकमका आधारमा रिलायन्स स्पिनिङ मिल्स, आँखुखोला जलविद्युत्, रिडी पावर, सोलु हाइड्रोपावर र एनआरएन इन्फ्रास्ट्रक्चर अग्रस्थानमा रहे। विश्लेषकहरूका अनुसार बजारमा लगानीकर्ताको मनोबल कायम रहँदा आगामी दिनमा पनि सूचक सकारात्मक रहने सम्भावना रहेको छ।