वर्षाका कारण श्रीलंकाविरुद्धको खेल रद्द, नेपाल क्वार्टरफाइनलबाटै बाहिरियो

काठमाडौं । जापानमा जारी एसियाली खेलकुदअन्तर्गत पुरुष क्रिकेटमा नेपाल र श्रीलंकाबीच तय भएको तेस्रो क्वार्टरफाइनल खेल वर्षाका कारण रद्द भएको छ।

बिहान ५:४५ बजेबाट सुरु हुने तय भएको खेल लगातारको वर्षाका कारण टससमेत हुन नपाई रद्द भएको हो। खेल रद्द भएपछि वरीयताका आधारमा श्रीलंकाले सेमिफाइनलमा स्थान बनाएको छ।

यससँगै नेपालको एसियाली खेलकुदअन्तर्गत पुरुष क्रिकेटको यात्रा फेरि एकपटक क्वार्टरफाइनलमै समाप्त भएको छ। नेपाल चौथोपटक क्वार्टरफाइनलबाटै बाहिरिएको हो।

यसअघि नेपाल सन् २०१०, २०१४ र २०२२ मा पनि एसियाली खेलकुदको क्वार्टरफाइनलबाट अघि बढ्न सकेको थिएन।

यसपटक समूह चरणमा नेपालले अफगानिस्तानलाई पराजित गरेको थियो। जापानविरुद्धको खेल भने वर्षाका कारण पूरा हुन नसक्दा नतिजाविहीन बनेको थियो र दुवै टोलीले अंक बाँडेका थिए।

श्रीलंकाविरुद्धको क्वार्टरफाइनलमा मैदानमा उत्रिएर प्रतिस्पर्धा गर्ने नेपालको अवसर पनि वर्षाकै कारण समाप्त भएको हो।