नेपालका सबै भूभागबाट बाहिरियो यस वर्षको मनसुन

काठमाडौं। यस वर्षको मनसुन बुधबारदेखि नेपालका सबै भूभागबाट बाहिरिएको छ। मौसम पूर्वानुमान महाशाखाले जारी गरेको बुलेटिनअनुसार असोज २८ गते मनसुन देशभरबाट पूर्ण रूपमा बाहिरिएको हो।

महाशाखाका अनुसार यस वर्षको मनसुन बहिर्गमन प्रक्रिया असोज १७ गतेदेखि सुरु भएको थियो। सुरुमा सुदूरपश्चिम र कर्णाली प्रदेशका साथै लुम्बिनी तथा गण्डकी प्रदेशका पश्चिमी भूभागका केही स्थानबाट मनसुन बाहिरिन थालेको थियो।

नेपालबाट मनसुन पूर्ण रूपमा बाहिरिने औसत मिति अक्टोबर २ अर्थात् असोजको सुरुवाततिर पर्छ। तर, यस वर्ष मनसुन औसत समयभन्दा १२ दिन ढिलो गरी बाहिरिएको महाशाखाले जनाएको छ।

मनसुन बाहिरिएसँगै वर्षायामको प्रभाव क्रमशः कम हुँदै जाने भए पनि मौसम पूर्ण रूपमा स्थिर नहुने देखिएको छ। महाशाखाका अनुसार मनसुन बाहिरिएपछि पनि स्थानीय वायु तथा पश्चिमी वायुको प्रभाव रहन सक्ने भएकाले केही स्थानमा मौसममा परिवर्तन आउन सक्छ।

मौसममा हुने सम्भावित परिवर्तनलाई ध्यानमा राख्दै महाशाखाले जारी गर्ने नियमित मौसम पूर्वानुमान तथा सूचनामा ध्यान दिनु आवश्यक छ।